"speechtube" 有話好說

細漢偷挽匏，大漢偷牽牛

『牛愛貫鼻，人愛教示，細漢無規矩，大漢就無情理，眾人就沒有啥物好日子』。各位評審，各位在座的朋友逐家好。』(鞠躬)

今仔日，我所欲演講的題目是，『細漢偷挽匏，大漢偷牽牛』。

『古早人講，細漢若無熨，大漢熨未曲，擱講囡仔三歲雕皮，四歲雕骨』，囡仔若沒教，早晚會夭壽骨。斟酌(仔細)教育辛苦的父母，就愛全力量早付出，毋通干礁(只是)會曉(會)把囡仔飼甲按呢肥滋滋。

人講『芥菜無挽毋成叢，囡仔無教毋成人』，作人做事的道理，自細漢就愛教起。通毋通，先想別人，是毋是，要先問自己，抑愛予伊了解別人的心理，按呢卡袂自私自利，講是非抑愛先檢討自己，卡袂無德無恥，毋驚囡仔不夠巧，尚驚(最怕)囡仔歹代誌攏會曉，毋驚囡仔袂變竅，尚驚囡仔袂見笑。去偷去搶，這代誌是真大條，若是予伊的序大人知影，那是會起痟(發瘋)，早晚會變作社會的孤鳥。假使若無量早教(提早教)，量早橋(提早調整)，細漢偷挽匏，大漢就偷牽牛，教到內底免錢飯是會永遠吃袂了。

『一枝草，一點露』，用心教，每一個囡仔攏是好材料，咱千萬毋通無好好給怹教示，見在怹爛了了。俗語講：『寵豬舉灶，寵子不孝，寵查某子袂落人家教；寵錢會富，寵仔賣厝』，囡仔毋通寵，寵子是壞心胸(性)，害到自己心肝「凝」(恨、無奈、不甘心之意)，若是害到別人那就真歹還。囡仔要飼抑要教，按哪無，第一憨是父母，人講娶某無師傅，飼仔才是師傅，欲教就愛趁早，尚慢就袂赴(來不及)喔。

所以代先，愛教伊會曉做家內事，教伊會曉照顧自己的身軀，若是大小項事攏想欲偎靠父母，這個囡仔大漢伊欲那有功夫。父母尚萬能，煞害到囡仔變無能，一天到晚，按呢散形散形，欲恩望伊成功，你看這甘有可能。所以自細漢就愛教伊自己洗碗，自己洗衫，教伊會曉尊重別人，做代誌摸心肝，對自己的行為負責任，按呢毋才是囡仔尚好的成績單。

囡仔若是做毋對代誌，咱做父母的就毋通做伊的靠山，就要明明白白予伊有是非，有道德，按呢毋才是偏差行為的藥單。囡仔細漢偷拿針，偷拿線，咱做序大人的就毋通放予散散，按哪無等伊大漢伊就偷拿擱卡大項的予你看，時到才來搥心肝，那就萬項攏尚晚。

雖然現代的囡仔攏是父母的寶，毋過在教育內底的疼心還擱有耐心是袂使無，有人看子做歹心糟糟，想欲罵子擱驚囉嗦，哀，這是現代父母的煩惱。其實囡仔攏嘛是吃啵吃啵(靠讚美)，做對做好，及時就要給伊o-lo(稱讚)，若是做歹做錯隨時就愛教伊改過，『大狗爬牆，小隻狗就看樣』，咱大人愛做囡仔的好模樣，教囡仔愛會曉替大人想，互相尊重，互相捧場，先做予伊看，才講予伊聽。捷拍袂痛，捷罵袂聽，你拍久抑是罵久，伊根本就毋驚。嚴官府出多賊，嚴父母出阿里不達，咱就要發揮耐心抑擱有疼心，邊教邊推，予囡仔有節制，抑有出息。

「細漢偷挽匏，大漢偷牽牛」，這個內底有一個尚蓋重要的人生觀，那就是要尊重別人的所有權，咱應該攏曾聽過囡仔在細漢的時陣攏會講，我的就是我的，別人的我嘛欲要，咱應該自細漢就清清楚楚教囡仔說，別人的就是別人的，袂使凊彩(隨便)黑白給別人拿，假使，若無建立這個人生觀，就會侵犯別人，毋管是偷拿，偷捻，還是偷粘，攏是侵佔。自細漢到大漢，攏袂使有這款行為經驗，就卡無犯法的危險。牛袂使偷牽，匏仔袂使偷挽，尊重別人的所有權，擱卡細項的嘛袂使侵犯。論真欲說『細漢偷挽匏，大漢偷牽牛』，在古早的農業時代，逐家是因為散赤(貧窮)才會去給人偷挽匏，偷牽牛，毋過今嘛(現在)的社會生活即呢富裕，同款有偷有搶這款事，做賊的，開賓士，抑擱歸身軀攏是有名的牌子，吼，社會足多這款怪事，為著虛華肖想欲逐項有，煞偏偏自己沒功夫。

所以，在今嘛的時代，『咱愛教示咱的序小，看到別人的好康、好物袂使心浮浮，知影見笑就毋免抹啥物S-K2，有正當的行為就是尚好的面子，人的一生自己作主，清氣(乾淨)健康過日子，尚可取。』我的演講就到這結束，多謝逐家。

引自：戴育真(2009)未出版論文。